Monday, October 8, 2007

ليه كدة يا فؤاد؟




ليه كدة يا فؤاد ؟

منا كنت ياعم راضىبحالى وبسمع إيهاب توفيق وهشام عباس ..

جيت إنت وبوظت كل حاجه

من ساعه ما سمعت أغنيه " ولا نص كلمه " وأنا مش عارف أغير مؤشر الـ winamp عنها ...

وبقيت أعدى على فايلات هشام وتامر حسنى وعمرو دياب وابص لها من فوق لتحت ...

بقيت أدخل الفايل الى مخصصه لالبومك الجديد وابص على الاغنيه الجديدة الوحيدة الى عرفت اجيبها لحد دلوقت ( ولا نص كلمه ) وأقول إمتى يكمل باقى الألبوم ؟!

تصدق يا فؤش إنى ساعات بدخل على الفايل بتاع ألبومك الجديد وأتخيل إن خلاص الألبوم كمل عندى !

دايما دى مشكلتى معاك ... وإنت كل ألبوم بتعرف تتقل اوى على الناس الخفيفه الى زيى ...

من أول ما كنت فى تالته إعدادى وكنت بعدىعلى بياعه الشرايط الى جنب ميس سلوى بولس بتاعه العلوم بعد الدرس ... فى عز برد ديسمبر وانا يالى عندى حساسيه فى الصدر , اقف عشان أسألها على شريطك الى دايما بتنزل البوستر بتاعه قبلها بتفرة ...

وكل مرة تقولى لسه منزلش ... كان البوم قلبى وروحى وعمرى .. ومن قبله البوم كماننا برضو عملت فيا نفس الحكايه ...

وفاكر يوم ما طلع البوم قلبى وروحى وعمرى جريت على البيت بالألبوم وقفلت باب الاوضه واختليت بالكاسيت وقعدت اسمع واسمع واسمع ... مش فاكر سمعت الالبوم كام مرة ...

ومرت السنين ...

وأديك النهردة بتنزل البومك الجديد بعد غياب طويل ...

وانا الى كنت فى اعدادى اتخرجت ...

والكاسيت رميناه وبقا عندى بداله CD player و MP3 player و DVD Player غير جهازين الكمبيوتر فى البيت ...

وبرضو كلهم مليانين بأغانيك ..

وبرضو لسه بحط فولدر جديد لكل البوم اجمع فيه الاغنيات واحدة واحدة ..

أختلفت الطرق ..

وفؤش واحد ..

نفس البوست منشور فى
دماغى

6 comments:

3araby said...

مبروووك لكل الفؤادية نزول الألبوم للكبير محمد فؤاد .

نفس اللى بيحصلك عند نزول اى ألبوم لفؤاد بيحصلى بس اتمنى انك تكون زيي عند نزول الألبوم مش تنزله من النت لأن عندك كمبيوتر وبس , أنا مازلت مقتنع ان الكاسيت ليه فايدة كبيرة و عشان كده مازلت بشترى ألبوم فؤاد قبل حتى ما انزله من النت ., لأن للأسف التقييم لشعبية فؤاد و مستوى الألبوم عن طريق المبيعات .

وفى انتظار نزول الألبوم ان شاء الله .

Badrawy said...

يا جماعة الألبوم نزل امبارح خلاص
و ممكن تنزله من مواقع كتيرة عشان يكمل عندك
زى موقع
http://nogomi.com/index.asp
وده لازم تكون مسجل فيه
http://www.mazikana.com/
و ده من غير تسجيل

mesh2dra said...

السلام عليكم

خدنى الحنين
طمنى عليك
يا جات ياراحت
وانت جمبي
شايف نفسك


كلماتهم حلووووة اوى

محمد فؤاد
له وحشه بجد

سلاماتي

Misrdream said...

صدفة

http://4.bp.blogspot.com/_QJzcBvk8FKc/RzcTtQvlxkI/AAAAAAAAAKU/Qpz4xn9gB1k/s1600-h/robbie.jpg

Intensive Care
Robbie Williams , 2005



http://2.bp.blogspot.com/_QJzcBvk8FKc/RzcSuwvlxjI/AAAAAAAAAKM/_LMbdaIVNic/s1600-h/fouad.jpg
ولا نص كلمة
محمد فؤاد 2007

Home Theater said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Home Theater, I hope you enjoy. The address is http://home-theater-brasil.blogspot.com. A hug.

dawar said...

ايه ده يامحمد ياحمدى مش ملاحقين عليك حتى هنا كمان
ايه النشاط ده انا مش باحسدك